القدال

 الشوارع    
27 نوفمبر 2016م

مشارعَ الخير..
شوارع غِــير
شوارع شعـبَـنا الحَـبُّـوبْ
كَـسَـاد
ورَمَـاد
حِـداد وسواد
ولا بتعرِف تـقول الروب
وكلما تجَهجِها الوثبات
بتعرِف لُـغْـوَة الراندوق
بتتعَـتَّـر
تقوم مَـرَّات وتتوَقَّــع
وفجأة تهِــب علي طولها
تقيف من نَـهْـدَة الوِقِّــيع
وتخَـبِر كيف تَـفِــك الطوق
وتعرف وين تلُخ الطين
وتعرف كيف تَـدُق الطوب
وتدي المعنى للطِـقّــيع
شوارع الخير .. مَـشارع غير
مشارع كُـلَّـهِــن وِلـدَنْ ولا نِـدْمَـن
وما مِـن الحُـزُن عِـدمَـن
ولا توب الكرامه رَمَــن
وزادَن في الكَـرَم كِـوِّيع
شوارع ما بتبيع روحها
ولا حتى بتقِــلب البيع
شوارعنا الشوارعية
تلاقي اللَّافَّة في الــلَّــفَّة
وتخُت السفَّــة في السفَّه
وتَــحَــبْس الدمعة بالصِّـنْـقيع.
شوارعي بيقرا في اللابتوب
شوارعي بيكتب الواتساب
شوارعي يدقِّس العاملين
جهاد
وجَــداد
شوارعي بيبدا بى نَـمَّة شوارع منتهى العِـصـيان
يصاقْع الأنبيا الكَـذَبَـه
ويسالم (مصطفى) النُـبْـيان
فهذي النَـمَّـة نَــمَّة سوط
يسوط الأدعيا الفَــسَــدَه
ويلوس الكاذِب المزعوط
يعود ينتِـف .. معِـط ..
ريشن
بِـتَـكْـرَهوا شَـعْـبَـكُم ليشِـن؟
وتـنسوا الآخرة ..
ساعة الموت
بتكرهوا شعبَـكُم ليـشِـنْ؟
وهُـو الأداكُم المَـثْـنَى وثُــلاث ورُبَــاع
وهو الودَّاكُم الكُــلِّـيَّــة
وهو اللبسكم النيشان
وهو السَّـكَّــنكم المنشية
هو العلمكم أكل الحوت
بتكرهو شعبكم ليشن؟
ومن خيرو الكتِف ورمان
دي شيزوفرينيا؟؟
والا انيميا
في حب الوطن واتراكمت أزمان
بتكرهو شعبكم ليشن؟
وتلهطوا من شمال وايمان
وتكالوا من الطيور عيشِــن
وتبزغوا في قداحة الخير
من البلد الحكم طيشِــن
تجحدوا في نعايم المولى
تلهفوا في فطايس النعمة
تلهطوا من حرام القوت
بتكرهوا شعبكم لي شنو؟
شتايمكم
فضل خيركم
عمايمكم
هي شوم طيركم
كروشكم
من فضل خيرنا
وتِــجَـدِّعوا خيرنا للغيرنا
وتمسحوا فوق رقابنا البوت؟
بتكرهو شعبكم ليشنو؟
بتكرهوا شعبنا الطيب
وتربحوا من لهب حربو
ترجعوا زي ديوك العِدَّه
وين ما يقبلوا يخربوا
فارجعوا بينا لي عند شارع التقنت
ولي الولد السقا الباجور
وارجعوا بينا لي يات من مطار في الدنيا
سودانير
لسانكم فينا زي منشار
بيطلع في الصباح
زفران
وينزل في المسا
كفران
دي وَلْــدَه وخاسره يا جربان
تقولوا عليه رباية جوع؟
وبين هوت دوق ولحس الكوع؟
تقول يا انتو ما ولاد تسعة
لا حَـوَّاتنا حوَّاتكم
ولا هذا البلد هيلكم
ولا رَبَّــتكم أُمَّــاتكم.